ರಚನೆ: ದ್ಯಾಂಪುರ ಶ್ರೀಚನ್ನಕವಿಗಳು
ಶ್ರೀ ಗುರು ಕುಮಾರ ಪರಶಿವ
ಯೋಗಿಯ ನೂರೆಂಟು ನಾಮಗಳನನವರತಂ
ರಾಗಂಮಿಗೆ ಪಠಿಪಾತಂ
ಗಾಗುವವಖಿಲಾರ್ಥ ಸಿದ್ಧಿ ಮುಕ್ತಿ ಗಳಿಳೆಯೋಳ್
ಶ್ರೀ ವಿರಾಟ್ ಪುರಾಧಿವಾಸ ಯತಿಕುಲೇಶ ಗುರುಕುಮಾರ
ಭಾವಭೇದವರಿದ ಮಹಿತ ಚಿತ್ಪ್ರಕಾಶ ಗುರುಕುಮಾರ
ಲಿಂಗಸಂಗ ಮದನ ಮದವಿಭಂಗತುಂಗ ಗುರುಕುಮಾರ
ಮಂಗಲಾಂಗ ಜಂಗಮಾದಿನಾಥವರದ ಗುರುಕುಮಾರ
ಯೋಗಶೀಲ ಭಕ್ತಪಾಲ ವಿರತಿಲೋಲ ಗುರುಕುಮಾರ
ರಾಗರಹಿತ ಸುಕೃತಚರಿತ ಸುಗುಣಭರಿತ ಗುರುಕುಮಾರ
ನಿನ್ನ ಪಾಲಿನನ್ನವತಿಥಿಗುಣಿಸಿ ತಣಿದೆ ಗುರುಕುಮಾರ
ಮನ್ನಣೆಯನು ಪಡೆದೆ ಬಾಲ್ಯದಲ್ಲಿ ನೀನು ಗುರುಕುಮಾರ
ಗಳಿಸಿದೆಲ್ಲ ಹಣವ ತಾಯಿಗೊಲಿದು ಕೊಟ್ಟೆ ಗುರುಕುಮಾರ
ಸಲಹಿದೊಂದು ಋಣಕೆ ಸಲ್ಲಿತೆಂದು ಪೇಳ್ದೆ ಗುರುಕುಮಾರ
ಮಗನ ಮೋಹವಳಿಯಲೆಂದು ತಾಯ್ಗೆ ಪೇಳ್ದೆ ಗುರುಕುಮಾರ
ಬಗೆಯ ಮಾತ್ರ ಮೋಹವೆನ್ನೊಳಿಲ್ಲವೆಂದೆ ಗುರುಕುಮಾರ
ನಿಜಗುಣಾರ್ಯ ಸುಗಮಶಾಸ್ತ್ರವರಿಯಲೆಂದು ಗುರುಕುಮಾರ
ಸುಜನರೊಡನೆ ಚಿಂತನವನು ಮಾಡಲಾದೆ ಗುರುಕುಮಾರ
ಜಡೆಯಸಿದ್ಧರಿಂದ ಸಂಶಯವನು ನೀಗಿ ಗುರುಕುಮಾರ
ಪಡೆದೆ ವೀರಶೈವ ಮಾರ್ಗ ನಿಶ್ಚತೆಯನು ಗುರುಕುಮಾರ
ಭವ ವಿಮೋಚನಕ್ಕೆ ಗುರುವನರಸಲಾದೆ ಗುರುಕುಮಾರ
ತವಕದಿಂದ ಬಸವಲಿಂಗ ಯತಿಯ ಕಂಡೆ ಗುರುಕುಮಾರ
ಎನಗೆ ನೀನೆ ಗುರುವರೇಣ್ಯನೆಂದು ನಂಬಿ ಗುರುಕುಮಾರ
ವಿನಯದಿಂದ ತತ್ಪದಾಶ್ರಯದೋಳ್ ನಿಂದೆ ಗುರುಕುಮಾರ
ಅತುಲ ಶೀಲ ಸತ್ಕ್ರಿಯಾಚರಣೆಯ ಪಿಡಿದೆ ಗುರುಕುಮಾರ
ಮತಿಯೊಳಲಸದದನು ಬಿಡದೆ ನಡೆಸಲಾದೆ ಗುರುಕುಮಾರ
ಯೋಗಶಾಸ್ತ್ರದಲ್ಲಿ ನಿಪುಣನಾದೆ ಕಲಿತು ಗುರುಕುಮಾರ
ಆಗಮಾರ್ಥ ತತ್ತ್ವಕುಶಲನೆನಿಸಿದಯ್ಯ ಗುರುಕುಮಾರ
ಮೊದಲು ಮನೆಯ ಜನರ ಹೊರಳಿ ನೋಡಲಿಲ್ಲ ಗುರುಕುಮಾರ
ಪುದಿದ ಶರಣರೆನ್ನ ಬಳಗವೆಂದು ತಿಳಿದೆ ಗುರುಕುಮಾರ
ಶಂಭುಲಿಂಗಶೈಲಕಾತನೊಡನೆ ಪೋದೆ ಗುರುಕುಮಾರ
ಶಂಭುಲಿಂಗವೀತನೆಂದು ಸೇವೆಗೈದೆ ಗುರುಕುಮಾರ
ಗುರುವಿನೊಲುಮೆಯಿಂದ ಚಿದುಪದೇಶವಾಂತೆ ಗುರುಕುಮಾರ
ಗುರುಸಮಾನ ಯೋಗ್ಯತೆಯನು ಪಡೆದು ಮೆರೆದೆ ಗುರುಕುಮಾರ
ಗುರುವಿನೊಡನೆ ದೇಶಪರ್ಯಟನವಗೈದೆ ಗುರುಕುಮಾರ
ಶರಣಗಣಕೆ ಪರಮತತ್ತ್ವದಿರವನೊರೆದೆ ಗುರುಕುಮಾರ
ಬಿದರಿಯೂರು ಕುಮಾರ ಶಂಭುಯೋಗಿಯಿಂದ ಗುರುಕುಮಾರ
ಸದಯಜಂಗಮಾಶ್ರಮವನು ಪೊಂದಿದಯ್ಯ ಗುರುಕುಮಾರ
ಹಾನಗಲ್ಲ ಮಠಕೆ ಸ್ವಾಮಿಯಾಗಿ ಮೆರೆದೆ ಗುರುಕುಮಾರ
ದಾನಧರ್ಮ ಶೀಲನೆನಿಸಿ ಪೆಸರ ಪಡೆದೆ ಗುರುಕುಮಾರ
ಸ್ಥಾಪಿಸಿದೆ ಮಹಾಸುಸಭೆಯನೆಮ್ಮಮತದೆ ಗುರುಕುಮಾರ
ರೂಪುಗೊಳ್ಳಲಾದುದೆಮ್ಮ ಧರ್ಮದೇಳ್ಗೆ ಗುರುಕುಮಾರ
ವರವಿರಾಗದಸಮ ಮಲ್ಹಣಾರ್ಯನೊಪ್ಪಿ ಗುರುಕುಮಾರ
ನೆರವನರ್ಥಿಸಿದನು ನಿನ್ನೊಳೀ ಮತಕ್ಕೆ ಗುರುಕುಮಾರ
ಗುರುಚರಾಧಿಕಾರಿಗಳನು ತಿದ್ದಲೆಂದು ಗುರುಕುಮಾರ
ಪರಮಯೋಗಶಾಲೆಯಾಗಲೆಂದು ಬಗೆದೆ ಗುರುಕುಮಾರ
ಚರಮಹಾಂತ ಯೋಗಿ ತೋರಿದೆಡೆಯೊಳೊಪ್ಪಿ ಗುರುಕುಮಾರ
ಹರನ ಯೋಗಮಂದಿರವನು ವಿರಚಿಸಿರ್ದೆ ಗುರುಕುಮಾರ
ಪಂಚಪೀಠದವರನಾದರಿಸಿದೆ ನೀನು ಗುರುಕುಮಾರ
ಪಂಚಸೂತ್ರ ಲಿಂಗರಚನೆಗೊಳಿಸಿದಯ್ಯ ಗುರುಕುಮಾರ
ಗೋಮಯವನು ಸುಟ್ಟ ಬೂದಿಯಿಂದ ಪಡೆದು ಗುರುಕುಮಾರ
ನೇಮವಿಡಿದು ಮಾಡಿಸಿದೆ ವಿಭೂತಿಯನು ಗುರುಕುಮಾರ
ಧರ್ಮದಿರವನಖಿಲ ಜನಕೆ ತಿಳಿಸಿ ಪೇಳ್ದೆ ಗುರುಕುಮಾರ
ಧರ್ಮದೇಳ್ಗೆಗಾಗಿ ಸವೆಸಿದಯ್ಯ ತನುವ ಗುರುಕುಮಾರ
ಪಿರಿದೆನಿಪ್ಪ ಗ್ರಂಥ ಸಂಗ್ರಹವ ನೆಗಳ್ದೆ ಗುರುಕುಮಾರ
ಹರುಷದಿಂದ ಯೋಗಸಾಧಕರನು ಪೊರೆದೆ ಗುರುಕುಮಾರ
ನಿತ್ಯ ದಾಸೋಹವಾಗಲೆಸಗಿದಯ್ಯ ಗುರುಕುಮಾರ
ಸತ್ಯವಾದಿಗಳಿಗೆ ಮೆಚ್ಚಿ ಹಿಗ್ಗುತಿರ್ದೆ ಗುರುಕುಮಾರ
ಅಂದಣದೊಳು ಜಂಗಮವನು ಮೆರೆಸಿದಯ್ಯ ಗುರುಕುಮಾರ
ಅಂದವೆನಿಸಿ ನೀನು ಏರಿ ಮೆರೆಯಲಿಲ್ಲ ಗುರುಕುಮಾರ
ಮೇಲಗದ್ದುಗೆಯನು ಬಯಸಿ ಬೇಡಲಿಲ್ಲ ಗುರುಕುಮಾರ
ಕೀಳುತಾಣವೆಂದು ಮನದಿ ಕುಗ್ಗಲಿಲ್ಲ ಗುರುಕುಮಾರ
ಪರತರ ಪ್ರಮಾಣದಂತೆ ನಡೆದು ಬಾಳ್ದೆ ಗುರುಕುಮಾರ
ಹರನ ಶಾಸ್ತ್ರ ವಚನಗಳನು ಮೀರಲಿಲ್ಲ ಗುರುಕುಮಾರ
ಅಂಗ-ಲಿಂಗ ಸಾಮರಸ್ಯ ಸುಖವನುಂಡೆ ಗುರುಕುಮಾರ
ಲಿಂಗಭೋಗ ಭೋಗಿಯೆಂದು ಕೀರ್ತಿ ಪಡೆದೆ ಗುರುಕುಮಾರ
ವೀರಶೈವ ಸಮಯ ಘನಧ್ವಜವನೆತ್ತಿ ಗುರುಕುಮಾರ
ಧಾರುಣಿಯೊಳು ಪಿಡಿದು ಮೆರೆಸಿದಯ್ಯ ವೀರ ಗುರುಕುಮಾರ
ಮುಕ್ತಿಗಿಂ ಸಮಾಜ ಸೇವೆಯಧಿಕವೆಂದೆ ಗುರುಕುಮಾರ
ಭಕ್ತಿ ಹೀನರನ್ನು ನೋಡಿ ಮನದಿ ನೊಂದೆ ಗುರುಕುಮಾರ
ಕುರುಡಗತುಲ ಗಾನಕುಶಲತೆಯನು ಕೊಡಿಸಿ ಗುರುಕುಮಾರ
ಧರೆಯೊಳಾತನಿಂದ ಪರ್ಬಲೆಸಗಿದಯ್ಯ ಗುರುಕುಮಾರ
ಪ್ರಮಥವರ್ತನವನು ತಕ್ಕುದೆಂದು ತಿಳಿದೆ ಗುರುಕುಮಾರ
ಪ್ರಮಥನಿಂದೆಗಿನಿಸು ತಡೆಯಲಿಲ್ಲ ನೀನು ಗುರುಕುಮಾರ
ಬಳಸಿದಯ್ಯ ಕೈಯ್ಯನೂಲಿನರಿವೆಗಳನು ಗುರುಕುಮಾರ
ಗಳಿಸಿದಯ್ಯ ಭಕ್ತಿ ಚಿದ್ ವಿರಕ್ತಿಗಳನು ಗುರುಕುಮಾರ
ತೆತ್ತೆ ಸ್ವಮತ ಸೇವೆಗಾಗಿ ಜನ್ಮವಿದನು ಗುರುಕುಮಾರ
ಮತ್ತೆ ಬರುವೆನೆಂದು ಕೊನೆಗೆ ಪೇಳಿ ಪೊದೆ ಗುರುಕುಮಾರ
ಅಂಗ ಭೋಗದಿಚ್ಛೆಗಾಡಲಿಲ್ಲ ದೇವ ಗುರುಕುಮಾರ
ಲಿಂಗದಿಚ್ಛೆಗಾಡ ನೆಚ್ಚಿ ಶಾಂತಿಪಡೆದೆ ಗುರುಕುಮಾರ
ಶಿವನ ಯೋಗಮಂದಿರಕ್ಕೆ ದುಡಿದು ದಣಿದೆ ಗುರುಕುಮಾರ
ಶಿವಸಮರ್ಚನಾನುಭವವ ಮಾಡಿ ತಣಿದೆ ಗುರುಕುಮಾರ
ಬೆಳೆದುದೀ ಸಮಾಜದಲ್ಲಿ ಬೋಧಕಾಳಿ ಗುರುಕುಮಾರ
ಬೆಳೆದರಭವಕಥಿಕರಿದುವೆ ನಿನ್ನ ಪುಣ್ಯ ಗುರುಕುಮಾರ
ನಿನ್ನ ಮಠವ ಮರೆದು ಮತವೆ ನನ್ನದೆಂದು ಗುರುಕುಮಾರ
ಮನ್ನಿಸಿದೆ ವಿಶಾಲ ದೃಷ್ಟಿಯಿಂದ ನೋಡಿ ಗುರುಕುಮಾರ
ಸಮಯ ಭೇದಗಳನ್ನು ಹೇಳಿ ಕೇಳಿ ಮುರಿದೆ ಗುರುಕುಮಾರ
ಸಮಯಭೇದವಪ್ರಮಾಣವೆಂದು ತಿಳಿದೆ ಗುರುಕುಮಾರ
ಭೂತ ಚೇಷ್ಟೆಗಳಿಗೆ ಲಿಂಗಪೂಜೆಯಿಂದ ಗುರುಕುಮಾರ
ಭೀತಿಗೆಡಿಸಿದಯ್ಯ ಮಠದೊಳಿರುವ ಜನದ ಗುರುಕುಮಾರ
ಪರಳಿಯಾ ವಿವಾದದಲ್ಲಿ ಜಯವ ಪಡೆದೆ ಗುರುಕುಮಾರ
ಧರೆಯ ಸುರರಿಗಾಯ್ತು ಮಾನಹಾನಿಯಂದು ಗುರುಕುಮಾರ
ಶರಣು ಹೊಕ್ಕವರ ಕಾಯ್ದೆ ಕರುಣದಿಂದ ಗುರುಕುಮಾರ
ನರರಿಗಾದ ಕಷ್ಟವೆನ್ನದೆಂದು ಅರಿತೆ ಗುರುಕುಮಾರ
ಪೋದ ಬಂದ ಗ್ರಾಮದಲ್ಲಿ ಸಭೆಯ ಕರೆದು ಗುರುಕುಮಾರ
ವೇದ ಮಂತ್ರ ಧರ್ಮಬೋಧೆಗೈದೆ ನೋಡಿ ಗುರುಕುಮಾರ
ಸೊನ್ನಲಿಗೆಯ ಶರಣರೊಪ್ಪಿ ಭಕ್ತಿಯಿಂದ ಗುರುಕುಮಾರ
ನಿನ್ನನಂತ್ಯದಲ್ಲಿ ಬಯಸಿ ಕಂಡರಂದು ಗುರುಕುಮಾರ
ತಿಳಿದೆ ಮಲ್ಲಿಕೆರೆಯ ಸ್ವಾಮಿಯಲ್ಲಿ ನೀನು ಗುರುಕುಮಾರ
ಸಲೆ ಶಿವಾನುಭವ ಸುಶಾಸ್ತ್ರದಿರವನೊಪ್ಪಿ ಗುರುಕುಮಾರ
ಕೊನೆಯೊಳೀ ಸಮಾಜಮತ ಸಮಾಜವೆಂದು ಗುರುಕುಮಾರ
ಕನವರಿಸುತ ಲಿಂಗದಲ್ಲಿ ಬೆರೆದೆ ನೀನು ಗುರುಕುಮಾರ
ಸಲಹು ತಂದೆ ತಾಯಿ ಬಂಧು ಬಳಗ ನೀನೆ ಗುರುಕುಮಾರ
ಸಲಹು ಬಸವ ಚನ್ನಬಸವ ಪ್ರಭುವೆ ನೀನು ಗುರುಕುಮಾರ
ತಿರುಗಲಾರೆನಖಿಲ ಯೋನಿಗಳೊಳು ನಾನು ಗುರುಕುಮಾರ
ಶರಣು ಹೊಕ್ಕೆನಯ್ಯ ನೋಡಿ ಕರುಣಿಸಯ್ಯ ಗುರುಕುಮಾರ
ಬಾರೋ ನನ್ನ ಕಲ್ಪತರುವೆ ತೋರು ಮುಖವ ಗುರುಕುಮಾರ
ಬಾರೊ ಪರಮಮೋಕ್ಷ ಗುರುವೆ ನಿಜದ ಕುರುಹು ಗುರುಕುಮಾರ
ಬಿಡದಿರೆನ್ನ ಕರವ ಭವಭವಂಗಳಲ್ಲಿ ಗುರುಕುಮಾರ
ನಡೆಸು ವೀರಶೈವ ಮಾರ್ಗದಲ್ಲಿ ಮುದದೆ ಗುರುಕುಮಾರ
ಶರಣು ಗುರುವೆ ಶರಣು ಲಿಂಗವೇ ಚರಾರ್ಯ ಗುರುಕುಮಾರ
ಶರಣು ಶರಣು ಚೆನ್ನಕವಿವರೇಣ್ಯ ವಂದ್ಯ ಗುರುಕುಮಾರ
ಇಂತೀ ಶುಭನಾಮಂಗಳಂ
ಸಂತಸದಿಂ ಜಪಿಸುತಿರ್ಪ ಘನಸುಕೃತಿಗಳಂ
ಕಂತುಹರ ಪಾಲಿಸುವನನಂತ ಸಮಾಧಾನ ಸುಖ ಸಮೃದ್ಧಿಯನಿತ್ತು.
Total views : 20635