ದೇವ ಕಾಯೋ ನೀ ಮಾಯಾತೀತನೆ

(ರಾಗ – ಕೇದಾರ ಗೌಳ)

ರಚನೆ :-ಪರಮ ಪೂಜ್ಯ ಲಿಂ.ಹಾನಗಲ್ಲ ಕುಮಾರ ಮಹಾಸ್ವಾಮಿಗಳವರು

ದೇವ | ಕಾಯೋ ನೀ ಮಾಯಾತೀತನೆ || ಪ ||

ವೀರಶೈವವ ಸಾರಿ ತೋರುವ |

ಭೂರಿ ಭಕ್ತಿಯುಕ್ತರ ಪಾರುಗೊಳಿಸುತೆ || 1 ||

ಶಿಷ್ಟ ಮತವಿದು ನಷ್ಟಗೊಳ್ವುದು |

ತುಷ್ಟಿಗೊಳಿಸುವೆನೆಂದ ಭೀಷ್ಟ ವೀಯುತೆ || 2 ||

ಮತವೆ ನಿನ್ನದು ಪತಿಯೆ ಕಾಯ್ವುದು |

ಗತಿಯ ಕಾಣದಿರ್ಪರ ಜತಿಯಗೂಡುತೆ || 3 ||

ಇಂತು ಸಭೆಯೊಳು ಕುಂತು ಜನಗಳು |

ಪಂಥಗಾರರಾಗಿರುವಂತೆ ಮಾಡುತೆ || 4 ||

ಬೇಡಿಕೊಂಬೆನು ಮಾಡು ಕೃಪೆಯನು |

ಮೂಢರಾದ ಜನಗಳ ನೋಡಿ ಮರೆಯದೆ || 5 ||

ವೇದವೆಂಬುದು ಭೇದವೀವುದು |

ಬೋಧಿಸೈಕ್ಯ ಮತದ ಹಾದಿ ತೋರಿಸಿ || 6 ||

ಮತವು ನಿನ್ನಯ ಹಿತದ ಸೀಮೆಯ |

ಗತಿಯೊಳೈಕ್ಯಗೊಳ್ಳುವ ಮತಿಯ ಕೊಡುತೆ || 7 ||

ಸ್ವಂತಪರರಿಗೆ ಸಂತ ಜನರಿಗೆ |

ಅಂತರ್ಯಾಮಿಯಾಗಿ ಹಂತೆ ತೊಲಗಿಸಿ || 8 ||

ಸಿದ್ಧಲಿಂಗನೆ  ಪೊದ್ದಿರ್ದದವರನೆ |

ಶುದ್ಧರಾಗಿರುವಂತೆ ತಿದ್ದಿ ತೋರುತೆ || 9 ||